मुंबई : मुंबईची ओळख असणारे हँगिंग गार्डन हे लवकरच बंद होणार आहे. शहराच्या विकासाच्या प्रक्रियेत जुन्या मुंबईची ओळख आणि शान असणारे हँगिग गार्डन आता काळाच्या पडद्याआड जाणार आहे. मलबार हिल येथील टेरेस गार्डनखाली असणाऱ्या ब्रिटिशकालीन जलाशयाची पुनर्बांधणी करण्यात येणार आहे.असून हे काम विविध टप्प्यांमध्ये केले जाणार आहे. जलाशयाच्या पुनर्बांधणीचे काम पूर्ण करण्यासाठी जवळपास ७ वर्षांचा अवधी लागू शकतो. त्यामुळे या काळात हँगिग गार्डनचा परिसर हा टप्याटप्प्याने बंद केला जाईल, अशी माहिती मुंबई महानगरपालिकेचे अतिरिक्त आयुक्त पी. वेलरासू यांनी दिली.
पी. वेलरासू यांनी दिलेल्या माहितीनुसार, हँगिग गार्डनच्या परिसरात होणाऱ्या विकासकामाच्या प्रक्रियेत जवळपास ४०० झाडे कापली जाणार आहेत. मात्र, यापैकी काही झाडे बाजूच्याच भागात पुन्हा लावली जातील. ४०० पैकी १८९ वृक्ष हे पूर्णपणे कापले जातील, तर २०० वृक्षांचे पुनर्रोपण केले जाईल. हँगिग गार्डनचा परिसर हा मुंबईतील उंचावरच्या भागांपैकी एक आहे.
ब्रिटिशकाळात दक्षिण मुंबईच्या परिसरात पाणीपुरवठा करण्यासाठी याठिकाणी जलाशय बांधण्यात आला होता. हँगिंग गार्डनचा परिसर वेगवेगळा करुन त्याखाली असणाऱ्या जलाशयाची पुनर्बांधणी करण्यासाठी ६९८ कोटी रुपयांचा प्रस्ताव मांडण्यात आला होता. या प्रस्तावाला मान्यता मिळाली असून नोव्हेंबर २०२३ पासून हँगिग गार्डनच्या परिसरात कामाला सुरुवात होईल.
