पुणे : आत्ताच मिळालेल्या माहितीनुसार, पुण्यातील कुख्यात गँगस्टर असलेला शरद मोहोळ याच्यावर आज शुक्रवार दिनांक 5 जानेवारीला दुपारी दीड ते पावणेदोनच्या सुमारास गोळीबार करण्यात आला आहे. मोहोळला सध्या उपचारासाठी सह्याद्री रुग्णालयात दाखल करण्यात आला आहे.
मिळालेल्या प्राथमिक माहितीनुसार, कुख्यात गँगस्टर शरद मोहोळ याच्यावर शुक्रवारी दुपारी दीड ते पावणेदोनच्या सुमारास काही हल्लेखोरांनी गोळ्या झाडल्या आहेत. धक्कादायक म्हणजे ही घटना कोथरूडच्या सुतारदरा परिसरामध्ये घडली आहे. हल्लेखोरांनी काही गोळ्या थेट मोहोळवर झाडल्या, प्राथमिक माहितीनुसार त्यास एक गोळी लागली आहे आणि सध्या सह्याद्री रुग्णालयात त्याच्यावर उपचार करण्यात येत आहेत.
कोण आहे शरद मोहोळ ?
शरद मोहोळ हा पुण्यातील कुख्यात गँगस्टर आहे. त्याच्याविरुद्ध अनेक गंभीर गुन्हे दाखल आहेत. शरद हिरामण मोहोळ (वय 38, रा. माऊलीनगर, सुतारदरा, कोथरूड) याच्या विरोधात पुणे शहर, पिंपरी तसेच जिल्ह्यातील ग्रामीण भागात गंभीर स्वरूपाचे गुन्हे दाखल आहेत. शरद मोहोळ आणि साथीदारांनी टोळीयुद्धातून गणेश मारणे टोळीतील पिंटू मारणे याचा खून केला होता. नीलायम चित्रपटगृहाजवळ एका हॉटेलमध्ये ही घटना घडली होती. या गुन्ह्यात न्यायालयाने शरद मोहोळ याला जन्मठेपेची शिक्षा सुनावली आहे. या प्रकरणात मुंबई उच्च न्यायालयाने मोहोळला गेल्या वर्षी जामीन मंजूर केला होता.
दरम्यान पुण्याच्या भर कोथरूड परिसरामध्ये फायरिंग झाल्यामुळे प्रचंड खळबळ उडाली आहे. सध्या वरिष्ठ पोलीस अधिकारी देखील घटनास्थळी दाखल झाले असून सीसीटीव्ही फुटेज तपासून पोलिसांनी तपासाला वेग दिला आहे.
