मुंबई : शिवसेना दसरा मेळाव्यावरून शिवसेना उद्धव बाळासाहेब ठाकरे गटाने मुंबई महापालिकेकडे एक महिना आधीच अर्ज दाखल केला आहे. या दसरा मेळाव्यावरून आता ठाकरे गटाचे खासदार संजय राऊत यांनी मुख्यमंत्री एकनाथ शिंदे यांच्यावर बोचरी टीका केली आहे. एकनाथ शिंदे यांच्या वडिलांनी शिवसेनेची स्थापना केली होती का ? अशा शब्दात त्यांनी हल्लाबोल चढवला असून प्रत्येकाने एकमेकांचा आदर राखला पाहिजे बाळासाहेब ठाकरे यांनी शिवसेना स्थापन केली असे देखील यावेळी संजय राऊत म्हणाले आहेत.
खासदार संजय राऊत म्हणाले की, शिवसेनेची स्थापना बाळासाहेब ठाकरे यांनी केली. त्यांच्या हयातीत उद्धव ठाकरेंची कार्याध्यक्षपदी निवड झाली होती. बाळासाहेब ठाकरे यांच्या निधनानंतर शिवसेनेच्या संपूर्ण कार्यकारिणीने उद्धव ठाकरेंची पक्षप्रमुख म्हणून निवड केली होती. त्यामुळे खरी शिवसेना ही उद्धव ठाकरेंच्या नेतृत्वातील आहे. उद्धव ठाकरेंचा फुटलेला गट नसून शिंदेंचा फुटलेला गट आहे. आता महाराष्ट्रात त्यांच्या हातात सत्ता आहे. त्यामुळे काहीही कराल हे चालणार नाही. गेल्या वर्षी दसरा मेळावा शिवतीर्थावर झाला, यंदाही तिथेच होईल…! असा ठाम विश्वास संजय राऊत यांनी व्यक्त केला आहे.
