कल्याण : कल्याणमध्ये एका व्यक्तीला विनाकारण बेदम मार खावा लागला आहे. परिसरातील एका मुलीला पळवून नेत असल्याचा संशय नागरिकांना आला. त्यामुळे या व्यक्तीला मारहाण करण्यात आली आणि त्यानंतर पोलिसांच्या हवाली करण्यात आले होते. दरम्यान पोलिसांनी केलेल्या अधिक चौकशीमध्ये ही व्यक्ती मुलीला पळून असल्याचा प्रयत्न करत नसून केवळ गैरसमजुकीतून ही घटना घडली असल्याचा पोलिसांनी स्पष्ट केलं.
कल्याण पश्चिम येथील बैल बाजार येथे कार्यालया जवळ एका हॉटेलमध्ये एक पाच वर्षाची मुलगी तिच्या वडिलांसोबत आली होती. हॉटेलच्या बाहेर एक व्यक्ती उभा होता. या व्यक्तीने त्या मुलीला काहीतरी देऊन पळून नेण्याचा प्रयत्न करीत असल्याचा संशय या ठिकाणी असलेल्या नागरिकांना आला. या व्यक्तीची नागरिकांनी विचारणा केली असता त्याला मराठी, हिंदी येत नसल्याने तो दक्षिणात्य भाषेत बोलत होता. त्यामुळे नागरिकांना गैरसमज झाला आणि थेट या व्यक्तीला बेदम मारहाण करण्यात आली आहे.
त्यानंतर बाजारपेठ पोलीस ठाण्याचे पोलीस अधिकारी किरण वाघ यांनी पुढील कारवाई केली असता या व्यक्तीला केवळ गैरसमजातून विनाकारण मार खावा लागल्याचे स्पष्ट झाले.