बारामती : यंदाची लोकसभा निवडणूक Lok Sabha Elections 2024 ही बारामतीसाठी राजकीयच नाही तर कौटुंबिक लढाई देखील सिद्ध होते आहे. बारामतीमध्ये या लोकसभा निवडणुकीत पवार विरुद्ध पवार असा सामना रंगणार आहे. दरम्यान राष्ट्रवादी काँग्रेस अजित पवार गटाच्या नेत्या रूपाली पाटील ठोंबरे यांनी अजित पवारांचे बंधू श्रीनिवास पवार यांच्या पत्नी शर्मिला पवार यांच्यावर घणाघाती टीका केली आहे.
बारामतीतील पवार विरुद्ध पवार या राजकीय आणि कौटुंबिक लढाईमध्ये संपूर्ण कुटुंब हे दोन भागात तुटलं गेल आहे. यामध्ये पवार कुटुंबीयांचा एक मोठा भाग हा सुप्रिया सुळे यांच्या प्रचारासाठी मैदानात उतरला आहे. धक्कादायक म्हणजे यामध्ये उपमुख्यमंत्री अजित पवार यांचे सख्खे भाऊ श्रीनिवास पवार हे देखील सुप्रिया सुळे यांच्या प्रचारासाठी संपूर्ण बारामतीमध्ये प्रचार करत आहेत. या प्रचारासाठी त्यांच्या पत्नी शर्मिला पवार यादेखील बारामती पिंजून काढत आहेत.
बर खासदार सुप्रिया सुळे यांचा प्रचार पवार कुटुंबीय करत असतानाच एकाच कुटुंबातील व्यक्तीच्या विरोधात असून सुद्धा ही लढाई जास्त राजकीय आहे. कारण सातत्याने सुनेत्रा पवार यांच्यावर कुटुंबीय राजकीय टीकाटिप्पणी करत आहेत. यावर आता राष्ट्रवादी काँग्रेस अजित पवार गटाच्या रूपाली पाटील ठोंबरे यांनी कडाडून टीका करताना म्हटले आहे की, ” सुनेत्रा वहिनींचा विजय निश्चित झाल्यापासून घरची आणि बाहेरची उंदर गरळ ओकायला लागली आहेत. आधी अजित पवार यांच्या बंधूंनी गरळ ओकली. आता शर्मिला पवार गरळ ओकत आहेत. आपली जाऊ खासदार होणार असल्याचा त्रास त्यांना होत आहे. त्यांना द्वेष वाटत आहे. शर्मिला ताईंना विनंती आहे की त्यांनी बोलताना थोडं तारतम्य पाळावं, अन्यथा तुम्हाला तुमच्याच भाषेत उत्तर दिलं जाईल. ” असा थेट इशाराचं रूपाली ठोंबरे यांनी दिला आहे.
