मुंबई : आज शिवसेना एकनाथ शिंदे गटामध्ये बॉलीवूड अभिनेता गोविंदा आहूजा याने जाहीर पक्षप्रवेश केला आहे. स्वतः मुख्यमंत्री एकनाथ शिंदे यांच्या उपस्थितीत गोविंदाने शिवसेनेत प्रवेश केला आहे.
आज मुख्यमंत्री एकनाथ शिंदे यांच्या वर्षा बंगल्यावर गोविंदा पोहोचला होता. त्यानंतर हे दोघेजण एकाच गाडीतून मुंबईच्या नरिमन पॉईंट येथील शिवसेनेच्या बाळासाहेब भवन येथे पोहोचले. या बाळासाहेब भावनामध्येच गोविंदाचा मोठा सत्कार करून प्रवेश झाल्याचे घोषित करण्यात आले आहे.
मला मिळालेली ही जबाबदारी मी प्रमाणिकपणे पार पाडेन – गोविंदा
यावेळी गोविंदाने आपल्या भावना व्यक्त करताना म्हटले आहे की, “नमस्कार, जय महाराष्ट्र! मी आज एकनाथ शिंदे यांना धन्यवाद देतो. मी सर्वांना शुभेच्छा देतो. मी आज या पक्षात प्रवेश करतोय. मी राजकारणातून बाहेर पडल्यानंतर असं वाटलं नव्हतं की मी पुन्हा राजकारणात येईल. पण 14 वर्षांच्या राजकीय वनवासानंतर मी जिथे आहे त्याच पक्षात एकनाथ शिंदे यांच्या कृपेने पुन्हा या पक्षात आलोय. मी सर्वांचे आभार मानतो. मी राजकारणापासून लांब जात होतो. मी धन्यवाद देतो. पण आपल्याकडून मला मिळालेली ही जबाबदारी मी प्रमाणिकपणे पार पाडेन. मी सेवा प्रदान करेन. मी कला आणि संस्कृतीसाठी काम करेन. महाराष्ट्राची भूमी ही संतांची भूमी आहे”, असं गोविंदा म्हणाला.
