मुंबई : महाराष्ट्रात राष्ट्रवादी काँग्रेसच्या शरद पवार आणि अजित पवार यांच्या गटात मोठा तणाव सध्या पाहायला मिळतोय. दोन्ही गट आज(५ जुलै) वेगवेगळी ताकद दाखवतील. यासाठी बैठक बोलावण्यात आलीये. व्हिप नाकारल्यास दोन्ही गटांवर कारवाई होणार. किती आमदार कोणासोबत आहेत, हे दोन्ही गटांच्या बैठकीतून स्पष्ट होण्याची शक्यता आहे. २८८ सदस्यांच्या महाराष्ट्र विधानसभेत राष्ट्रवादीचे ५३ आमदार आहेत आणि पक्षांतर विरोधी कायद्यांतर्गत अपात्रता टाळण्यासाठी अजित पवार गटाला किमान ३६ आमदारांच्या पाठिंब्याची गरज आहे. अजित पवार महाराष्ट्रातील एकनाथ शिंदे यांच्या नेतृत्वाखालील सरकारमध्ये सामील झाल्यानंतर, राष्ट्रवादी काँग्रेसवर दावा करण्यासाठी त्यांची आणि शरद पवार यांच्यातील लढाई टोकाला गेलीये. अजित पवार यांनी मंगळवारी पंतप्रधान नरेंद्र मोदी यांच्या नेतृत्वाचे कौतुक करत त्यांना पर्याय नसल्याचे सांगितले.
‘गडी एकटा निघाला…८३ वर्षाचा’
आजचा दिवस महाराष्ट्रासाठी खुप महत्वाचा ठरणारे. अजित पवार गटाने ४४ पेक्षा अधिक आमदारांचा पाठिंबा असल्याचा दावा केलांय. देवगिरी बंगल्यावर मोठ्या प्रमाणात हालचाली सुरू झाल्या आहेत. किती बळ कोणाकडे आहे हे आज पाहायला मिळणारे. आज दुपारी एक वाजता वाय. बी सेंटरला शरद पवारांची (Sharad Pawar) १ वाजता बैठक होणारे. तर आज मुंबईतील एमईटीमध्ये अजित पवार गटाची ११ वाजता पहिलीच बैठक होणारे. राष्ट्रवादी कोणाची हे आज स्पष्ट होणारे. शरद पवार यांच्या समर्थकांकडून मोठी बॅनरबाजी करण्यात येत आहे. ‘गडी एकटा निघाला…८३ वर्षाचा’ अशा आशयाचे मंत्रालयासमोर बॅनर्स लावण्यात आले आहेत. त्याचवेळी सरकारमध्ये असलेल्या अजित पवारांसह केवळ नऊ आमदारांनी बाजू बदलली असून बाकीचे आमदार शरद पवार यांच्यासोबत असल्याचा दावा शरद पवार गटाने केलांय.
एनसीपीच्या नव्या कार्यालयात शरद पवार यांचा फोटो
पवार यांची भेट घेतल्यानंतर पटोले म्हणाले, भाजपने राष्ट्रवादीचा विधीमंडळ पक्ष फोडण्याचा ज्याप्रकारे कट रचला, त्याचा काँग्रेस निषेध करतो. एमव्हीए एकजूट असून भाजपचा पराभव करेल. जनता आपल्या पाठीशी आहे, असे काँग्रेस विधिमंडळ पक्षनेते बाळासाहेब थोरात यांनी सांगितले. ते म्हणाले, शरद पवार हे ज्येष्ठ नेते असून आपण सर्वजण त्यांचे मार्गदर्शन घेतो. राष्ट्रवादीचे अध्यक्ष शरद पवार यांनी मंगळवारी सांगितले की, ज्यांनी त्यांच्या विचारसरणीचा ‘विश्वासघात’ केला, त्यांनी त्यांचे फोटो वापरू नये. तत्पूर्वी, मंगळवारी दक्षिण मुंबईत अजित पवार यांच्या नेतृत्वाखालील राष्ट्रवादी काँग्रेस पक्षाच्या नव्या कार्यालयात शरद पवार यांचे फोटो पाहायला मिळाले. त्यांचे पुतणे अजित पवार यांनी शिवसेना-भाजप सरकारमध्ये सामील झाल्यानंतर आणि त्यांना मोठ्या संख्येने आमदारांचा पाठिंबा असल्याचा दावा केल्यानंतर शरद पवार यांनी पक्षातील संकटाला तोंड देण्यासाठी कायदेशीर मत मागितल्याचं सांगितलं जात आहे.
मोदींसारखा नेता नाही – अजित पवार
अजित पवार (Ajit Pawar) यांच्या हस्ते दक्षिण मुंबईतील राष्ट्रवादी काँग्रेस पक्षाच्या नवीन कार्यालयाचे उद्घाटन झाले. यावेळी पत्रकारांशी बोलताना ते म्हणाले, मोदींच्या नेतृत्वाखाली देश पुढे जात आहे. त्यांना पाठिंबा देण्यासाठी आम्ही सरकारमध्ये सहभागी झालो आहोत. ते म्हणाले, ‘मोदींसारखा नेता नाही. राज्यातील मंत्र्यांची खाती लगेच जाहीर करणार नसल्याचे अजित पवार यांनी संकेत दिले. अजित पवार यांनी पदाचा राजीनामा दिल्यानंतर आणि शिवसेना-भाजप सरकारमध्ये सामील झाल्यानंतर विरोधी पक्षनेतेपदासाठी दावा करण्याच्या मुद्द्यावर राष्ट्रवादी काँग्रेस पक्ष चर्चा करू शकते. येथील विधानभवनात झालेल्या बैठकीत काँग्रेसने महाविकास आघाडी (MVA) बळकट करण्यासाठी पक्षासोबत काम करण्याचा निर्णय घेतला. काँग्रेसचे महाराष्ट्र कार्य प्रभारी एच. पाटील यांच्या उपस्थितीत काँग्रेस विधिमंडळ पक्षनेते बाळासाहेब थोरात यांच्यासह पक्षाचे ४५ पैकी ३९ आमदार सहभागी झाले होते.