यवतमाळ : यवतमाळमधील हत्येच्या या घटनेने एकच खळबळ उडाली आहे. गाडीचा कट लागला आणि त्यातून झालेल्या बाचाबाचीतून आरोपी तरुणानं थेट जवळच्या गावठी कट्ट्यातून गोळीबार केला. या गोळीबारामध्ये शादाब खान वय वर्ष 22 या तरुणांचा जागीच मृत्यू झाला आहे.
मिळालेल्या माहितीनुसार, मनीष शेंद्रे हा आरटीओ ऑफिस चौकातून कळंब चौक परिसराकडे जात होता. यावेळी त्याची मैत्रीण त्याच्यासोबत होती. दरम्यान शदाब खान यांच्या गाडीचा त्यांना धक्का लागला. यामधून दोघांमध्ये काही वेळ बाचाबाची झाली. त्यानंतर मनीष शेंद्रे हा थेट त्याच्या घरी गेला आणि घरून देशी कट्टा घेऊन परत कळंब चौकाकडे आला. यावेळी देखील त्याची मैत्रीण त्याच्यासोबत होती. या दोघांचे पुन्हा एकदा वाद सुरू झाले. तू माझ्या मैत्रिणीला आणि मला शिवीगाळ का केलीस ? असे म्हणून रागाच्या भरात आरोपी मनीष शेंद्रे यांनी थेट शादाब खान यांच्या छातीवर गोळ्या झाडल्या आहेत. या घटनेमध्ये शादाब खान हे मयत झाले असून शादाब यांचे वडील रफिक खान इनायत खान यांनी शहर पोलीस स्थानकात गुन्हा दाखल केला आहे. अधिक तपास सुरू आहे.
