छत्रपती संभाजीनगर : नवीन वर्षामध्ये 20 जानेवारी ही तारीख राज्य सरकारच्या उरात धडकी भरवणारी ठरू शकते. कारण अंतरवली सराटी मधून जरांगे पाटील नावाचं भगव वादळ पायी मुंबईकडे कूच करणार आहे. तसेच या आंदोलकांची ताकद देखील वाढत जाणार आहे. कारण अंतरवली सराटी ते मुंबई दरम्यान अनेक महत्त्वाच्या शहर आणि गावांमधून हे आंदोलन पुढे सरकणार आहे.
मराठा समाजाला ओबीसी मधून सरसकट आरक्षणाच्या मागणीसाठी आतापर्यंत मनोज जरांगे पाटील यांनी दोन वेळा आमरण उपोषण केलं. दोन्ही वेळी राज्य सरकारने ठाम आश्वासन दिले. परंतु अद्याप कोणताही निर्णय घेण्यात आलेला नाही. तसेच जो तोडगा राज्य शासनाने जरांगे पाटील यांच्यासमोर मांडला आहे. तो पूर्णपणे जरांगे पाटील यांना मान्य नाही. त्यामुळे आता 20 जानेवारीला सकाळी नऊ वाजता जरांगे पाटील हे मुंबईच्या दिशेने निघणार आहेत.
Related posts
दरम्यान गुरुवारी छत्रपती संभाजी नगर मध्ये जरांगे पाटील यांनी पत्रकार परिषद घेतली. या पत्रकार परिषदेमध्ये त्यांनी हे आंदोलन कोणत्या मार्गे पुढे सरकेल तसेच मुंबईमध्ये पोहोचेपर्यंत आणि पोहोचल्यानंतर नेमकं कसं नियोजन असेल याविषयी सविस्तर माहिती देताना म्हटले आहे की, ” अंतरवाली सराटी येथून निघाल्यानंतर मराठा मोर्चा हा प्रथम बीडमध्ये दाखल होईल. त्यानंतर हा मोर्चा जालना-शहागड,-गेवराई-अहमदनगर-शिरुर-शिक्रापूर, रांजणगाव-खराडी-शिवाजीनगर-पुणे-लोणावळा-पनवेल- वाशी-चेंबूर-शिवाजी पार्क असा प्रवास करत आझाद मैदानात दाखल होतील. अंतरवाली सराटीहून मुंबईकडे जाताना मराठा आंदोलकांची वेगवेगळ्या तुकड्यांमध्ये विभागणी होईल. या तुकडीच्या प्रमुखांनी आपापल्या लोकांची काळजी घ्यावी. कोणत्याही तुकडीतील लोक उद्रेक किंवा जाळपोळ करणार नाहीत, याची जबाबदारी संबंधित तुकडी प्रमुखाची असेल” असे मनोज जरांगे पाटील यांनी सांगितले.
अंतरवाली सराटीवरुन निघाल्यानंतर मुंबईला जाईपर्यंत रस्त्यामधील गावांकडून आपल्या खाण्यापिण्याची सर्व सोय होईल, अशी अपेक्षा आहे. त्यामुळे आपल्यासोबत नेलेली खाण्यापिण्याची शिदोरी मुंबईतच उघडावी लागेल. तरीही मराठा आंदोलकांची संख्या मोठी असल्यास एखाद्या गावात खाण्यापिण्याची सोय होऊ न शकल्यास मोर्चेकऱ्यांनी तयारीत राहावे. आपल्यासोबतच्या वाहनात स्वयंपाकाची सामुग्री आणि गरजेच्या सर्व गोष्टी ठेवा. आपलं वाहन हेच आपलं घर करा. ऊन, पाऊस, थंडी यापासून रक्षण करण्यासाठी याच वाहनांचा वापर करा. अंतरवाली ते मुंबई या प्रवासात पाय दुखले किंवा आजारी पडलात तरी औषधाच्या गोळ्या सोबत ठेवा, आपल्याला न थांबता मुंबईला जायचे आहे. मुंबई गाठायची या एकाच ध्येयाने वाटचाल करा. मराठ्यांनो मुंबईत अशी धडक मारा की, कोणी अशी धडक मारली नसेल. मुंबईत गेल्यानंतर यश मिळाल्याशिवाय माघारी यायचे नाही. त्यामुळे शेतीची कामं उरकून मराठा बांधवांनी ताबडतोब मुंबईकडे जाण्यासाठी सज्ज व्हावे.सणवार, उत्सव, लग्न ही नंतर करता येतील. हा आपला शेवटचा लढा आहे. आतापर्यंत राज्यभरात मराठ्यांच्या ५४ लाख कुणबी नोंदी सापडल्या आहेत. जालन्यात एका नोंदीवर ७० मराठा बांधवांना कुणबी प्रमाणपत्र मिळाले. या हिशोबाने ५४ लाख नोंदीवर २ कोटी मराठा बांधवांना कुणबी प्रमाणपत्र मिळू शकते. कुणबी नोंदींचा ५४ लाख हा आकडा मराठा आरक्षणाचा कायदा करण्यासाठी पुरेसा आहे, असे जरांगे पाटील यांनी म्हटले.
