मुंबई : मुख्यमंत्री एकनाथ शिंदे यांनी मनोज जरांगे पाटील यांच्या सर्व मागण्या मान्य केल्याचा अध्यादेश काढला यानंतर महाराष्ट्रात मराठा समाजाने आनंद उत्सव साजरा केला पण दुसरीकडे अनेक नेत्यांनी विरोध देखील व्यक्त केला आहे. यामध्ये सर्वात पहिलं नाव येतं ते छगन भुजबळ यांचं…
मराठा आरक्षणावरून छगन भुजबळ यांनी पहिल्यापासूनच विरोधी भूमिका घेतली आहे. मराठा समाजाला आरक्षण देताना ओबीसी समाजाच्या आरक्षणाला धक्का लागू नये अशी भूमिका त्यांची पहिल्यापासून होती. परंतु मुख्यमंत्री एकनाथ शिंदे यांनी जरांगेंच्या मागण्या मान्य करून ओबीसींचे नुकसान केले असाच पवित्रा मंत्री छगन भुजबळ यांनी घेतला आहे.
मुख्यमंत्री एकनाथ शिंदे यांनी अध्यादेश काढल्यानंतर छगन भुजबळ यांनी वकील आणि ओबीसी समाजाला थेट न्यायालयात जाण्याचा सल्ला देऊन राज्य सरकारला घरचा आहेरच पाठवला आहे. यावर आता महायुतीतूनच त्यांच्या राजीनाम्याची मागणी देखील केली जाते. यामध्ये आमदार संजय गायकवाड यांनी थेट मुख्यमंत्री एकनाथ शिंदे यांच्याकडे मंत्री छगन भुजबळ यांच्या हकालपट्टीची मागणी केली.
आमदार संजय गायकवाड म्हणाले की, ” मंत्री छगन भुजबळ जो तिरस्कार करतात ते योग्य नाही. मुख्यमंत्री एकनाथ शिंदे साहेब भुजबळ यांची कालपट्टी करा . कशाला लाड करता ? याला आधी बाहेर काढा, मंत्रिपदाची शपथ घेताना सरकारच्या विरोधात काम करणार नाही याची शपथ भुजबळ यांनी घेतली आहे. त्यांच्या भूमिकेशी सरकार सहमत नाही. राष्ट्रवादी काँग्रेसचे नेतेही सहमत नाहीत. मुख्यमंत्र्यांनी छत्रपतींची शपथ घेतली. ज्या मराठ्यांनी हा देश वाचवला त्यांच्या विरोधात भूमिका घेणे योग्य नाही. एका मंत्र्याच्या विरोधाने सरकारला फरक पडत नाही. मी खुलेआम सांगतोय त्यांच्या राजीनाम्याने ना सरकारला फरक पडणार आणि ना एनसीपीला असा टोला देखील संजय गायकवाड यांनी लगावला. दरम्यान संजय गायकवाड यांच्या भूमिकेला आमदार संजय शिरसाट यांनी देखील दुसरा दिला आहे.
