पुणे : पुण्यासाठी गजा मारणे हे नाव काही नवीन नाही. कुख्यात गुंड गजानन मारणे याच्या विरोधात आतापर्यंत अनेक गुन्हे दाखल आहेत. तर नुकताच एक फोटो सोशल मीडियावर व्हायरल होतो आहे. ज्यामध्ये उपमुख्यमंत्री अजित पवार यांचे चिरंजीव पार्थ पवार हे गजानन मारणे याची भेट घेत आहेत. या दोघांच्या या फोटोमध्ये राजकीय वर्तुळात देखील चर्चेला उधाण आले आहे.
दरम्यान राष्ट्रवादी काँग्रेस शरद पवार गटाचे आमदार एकनाथ खडसे यांनी थेट उपमुख्यमंत्री अजित पवार यांच्यावर कडाडून टीका केली आहे. यावेळी एकनाथ खडसे म्हणाले की, ” अजित दादा कायदा आणि सुव्यवस्थेवर बोलणं हाच मोठा विनोद आहे. अजित पवार कायदा आणि सुव्यवस्थेचा समर्थन करत असतील , कायदा सुव्यवस्था चांगली आहे. तर मग त्यांचे चिरंजीव पार्थ पवार, गजानन मारणे यांची भेट घेतात. गजानन मारणे टोळीचा प्रमुख आहे. पुणे शहरात मोठ्या प्रमाणात कायदा सुव्यवस्थेचा भंग केला जातो. असे त्याच्यावर सहा गुन्हे दाखल आहेत. अशांना भेटणं योग्य नाही. किमान अजित पवारांनी आपल्या मुलाला तरी समजवावं असा टोला एकनाथ खडसे यांनी लगावला आहे.
