मुंबई : अजित पवारांसह राष्ट्रवादी काँग्रेसचे आमदार शिंदे फडणवीस सरकारमध्ये सामील झाले आहेत. यानंतर महाविकास आघाडीतील काही नेत्यांनी केलेल्या धक्कादायक खुलाश्यानुसार नुसार अजित पवार हे भारतीय जनता पार्टीने मुख्यमंत्री करण्याचा शब्द दिल्याने सरकारमध्ये सामील झाले असून सध्याचे मुख्यमंत्री एकनाथ शिंदे यांच्यासह सोळा आमदार लवकरच अपात्र ठरतील आणि मुख्यमंत्रीपदी अजित पवारांची वर्णी लागेल असे सुतवाच केले आहे. तर पुढील सहा महिन्यात सर्व चित्र बदलेल असा दावा देखील काही नेत्यांकडून केला जातो आहे.
यावर उपमुख्यमंत्री देवेंद्र फडणवीस यांनी देखील थेट शब्दात दुजोरा दिला नसला तरी, अजित पवारांना जेव्हा मुख्यमंत्री बनवायचं असेल तेव्हा त्यांना पाच वर्षांसाठी मुख्यमंत्री बनवू. जेव्हा संधी मिळेल तेव्हा त्यांना मुख्यमंत्री करू तसे विधान केल्याने राजकीय वर्तुळात चर्चेला उधाण आले आहे.
उपमुख्यमंत्री देवेंद्र फडणवीस म्हणाले की, “आता मी तुम्हाला स्पष्टपणे एवढेच सांगू इच्छितो की, सध्या एकनाथ शिंदे मुख्यमंत्री आहेत. तेच मुख्यमंत्री राहतील मुख्यमंत्री एकनाथ शिंदे यांच्या नेतृत्वाखाली लोकसभा विधानसभा निवडणुका लढवल्या जातील. त्यामुळे महाराष्ट्रात मुख्यमंत्री बदलणार आहे हे तुम्ही डोक्यातून काढून टाका. महाराष्ट्रात मुख्यमंत्री बदलणार नाहीत म्हणजे बदलणार नाहीत असे देखील फडणवीस पुढे म्हणाले आहेत.
