मुंबई : मनसे प्रमुख राज ठाकरे यांनी केंद्रीय गृहमंत्री अमित शहा यांची भेट घेतल्यानंतर ते महायुतीमध्ये सामील होणार या चर्चेला उधाण आले आहे. या चर्चेवर लवकरच घोषणा होण्याची देखील दाट शक्यता आहे. मुंबईमध्ये बैठकांना प्रचंड वेग आला आहे.
सध्या मुंबईमध्ये वांद्रे येथील हॉटेल ताज लँड्स अँड या ठिकाणी मुख्यमंत्री एकनाथ शिंदे, उपमुख्यमंत्री देवेंद्र फडणवीस आणि मनसे प्रमुख राज ठाकरे यांची महत्त्वाची बैठक सुरू आहे. या बैठकीनंतर राज ठाकरे महाराष्ट्रातील विविध लोकसभा मतदार संघातील पदाधिकाऱ्यांशी बैठक घेऊन महायुतीत सामील झाल्यानंतर पुढची दिशा काय या विषयावर चर्चा करणार असल्याचं सूत्रांनी म्हटले आहे.
दरम्यान या बैठकीनंतर राज ठाकरे हे महाराष्ट्रातील लोकसभा मतदारसंघातील पदाधिकाऱ्यांची बैठक करणारा असून नाशिकच्या जागेवर उमेदवारी मागणार असल्याचे बोलले जाते. त्यासह मनसेची ठाणे आणि पुण्यामध्ये चांगली मोर्चे बांधणी आहे. त्यामुळे आता जर मनसेने महायुतीमध्ये सामील होण्याचा निर्णय जाहीर केला तर कोणत्या जागा मनसेच्या वाट्याला येतात हे पाहणं देखील महत्त्वाचं ठरणार आहे.
