छत्रपती संभाजीनगर : छत्रपती संभाजीनगरमध्ये यंदा प्रतिष्ठेची लढाई लढली जात आहे. जागावाटपाच्या तिढ्यानंतर नेमका उमेदवार कोण हा तिढा आता सुटला आहे. आणि अखेर महायुतीच्या वतीने शिवसेना एकनाथ शिंदे गटाचे संदिपान भुमरे विरुद्ध चंद्रकांत खैरे अशी लढत छत्रपती संभाजीनगरमध्ये लढली जाणार आहे.
संदिपान भुमरे यांच्या प्रचारासाठी स्वतः मुख्यमंत्री एकनाथ शिंदे हे छत्रपती संभाजीनगरमध्ये उपस्थित होते. संदीपान भुमरे विरुद्ध चंद्रकांत खैरे अशी प्रमुख लढत असून यामध्ये इम्तियाज जलील यांचे देखील तगड आव्हान असणार यात शंका नाही. यावेळी मुख्यमंत्री एकनाथ शिंदे यांनी उद्धव ठाकरे गटाचे प्रमुख उद्धव ठाकरे यांच्यावर जोरदार हल्लाबोल करत राज ठाकरेंच्या पावलावर पाऊल ठेवून लाव रे तो व्हिडिओ असा नवीन प्रचाराचा फंडा शोधून काढला आहे.
यावेळी एकनाथ शिंदे यांनी उद्धव ठाकरेंवर थेट शब्दात टीका करताना म्हटलं आहे की, ” सर्वात फास्ट रंग बदलणारा सरडा..! असं उद्धव ठाकरेंना म्हटलं. आणि लाव रे तो व्हिडिओ म्हणून एक व्हिडिओ प्ले करायला सांगितला. या व्हिडिओमध्ये उद्धव ठाकरे हे पंतप्रधान नरेंद्र मोदींचं कौतुक करताना दिसत आहेत. तर काँग्रेसवर जोरदार टीका करताना दिसून येत आहेत.
हा व्हिडिओ दाखवून झाल्यानंतर एकनाथ शिंदे म्हणाले की, आता बघितलत का तुम्ही नरेंद्र मोदींच्या नावाने खडे फोडणारे कोण सरडे रंग बदलतात. पण एवढ्या फास्ट बाप एक नंबरी बेटा दस नंबरी अशा शब्दात एकनाथ शिंदेंनी टीका केली आहे.
