बारामती : आज चौथ्या टप्प्यातील निवडणुका देशभरामध्ये पार पडत आहेत चौथ्या टप्प्यात देखील 11 पैकी अनेक विवादित मतदार संघ आहेत दरम्यान बारामतीतून पुन्हा एक मोठी खळबळ जनक घटना उघडकीस आली आहे. बारामती लोकसभेसाठी सात मे रोजी मतदान पार पडलं. दरम्यान मतदान प्रक्रिया पार पडल्यानंतर हे ईव्हीएम EVM मशीन ज्या स्ट्रॉंग रूम मध्ये ठेवण्यात आले होते. तेथील सीसीटीव्ही कॅमेरा 45 मिनिट बंद पडला होता असा खळबळ जनक दावा राष्ट्रवादी काँग्रेस शरद पवार गटाच्या नेत्या सुप्रिया सुळे यांनी केला आहे.
नेमकं काय म्हणाल्या सुप्रिया सुळे
बारामती लोकसभा मतदारसंघाच्या उमेदवार सुप्रिया सुळे यांनी सोशल मीडियावर एक व्हिडिओ शेअर केला आहे ज्यामध्ये त्यांनी बारामतीतील स्ट्रॉंग रूम्स सीसीटीव्ही फुटेज पोस्ट केले आहे या पोस्टमध्ये त्यांनी लिहिले आहे की, ” बारामती लोकसभा मतदारसंघाचे मतदान पार पडल्यानंतर त्या इव्हिएम ज्या गोडावूनमध्ये ठेवल्या आहेत, तेथील सीसीटिव्ही आज सकाळी ४५ मिनिटे बंद पडले होते. इव्हिएमसारखी अतिशय महत्वाची गोष्ट जेथे ठेवलेली आहे, तेथील सीसीटिव्ही बंद पडणे ही बाब संशयास्पद आहे. तसेच हा खुप मोठा हलगर्जीपणा देखील आहे.याबाबत निवडणूक प्रतिनिधींनी संबंधित अधिकारी आणि प्रशासनाला संपर्क साधला असता समाधानकारक उत्तरे आलेली नाहीत. याखेरीज सदर ठिकाणी टेक्निशियन देखील उपलब्ध नाही. तसेच आमच्या प्रतिनिधींना इव्हिएमच्या स्थितीची पाहणी देखील करु दिली जात नाही. हे अतिशय गंभीर आहे. निवडणूक आयोगाने तातडीने याची दखल घेऊन सीसीटिव्ही का बंद पडला याची कारणे जाहिर करावी. याखेरीज संबंधित घटनेला जबाबदार असणाऱ्यांवर उचित कारवाई करणे गरजेचे आहे.
दरम्यान या खळबळजनक घटनेनंतर बारामतीतून नवीन वादाला पेव फुटले आहे. यावर निवडणूक निर्णय अधिकारी यांनी स्पष्टीकरण दिले आहे. त्या म्हणाल्या की, सध्या टीव्हीवर एक बातमी वायरल होती आहे की बारामती येथील गोदामा मधील कॅमेरे बंद आहे. परंतु त्याची सविस्तर चौकशी केली आहे. आणि त्याच्यामध्ये असं दिसून आले की इलेक्ट्रिशन काम करत असताना अल्प कालावधीसाठी त्यांनी एक केबल काढली होती. त्यामुळे टीव्ही युनिट व डिस्प्ले होत नव्हतं. मात्र सर्व कॅमेरे फंक्शनल आहे. सर्व डेटा त्या कालावधीचा देखील इंटरॅक्ट आहे आणि आता कुठलीही प्रकारची अडचण नाही. सर्व प्रक्षेपण हे आपल्याला टीव्ही युनिटवर व्यवस्थित दिसत आहे. आणि कुठल्या प्रकारची अडचण नाही.” असे स्पष्टीकरण निवडणूक निर्णय अधिकारी कविता द्विवेदी यांनी दिली आहे.
