नागपूर : आगामी लोकसभा निवडणुकीची तयारी म्हणून काँग्रेसकडून पूर्व विदर्भातील जिल्हानिहाय आढावा बैठक नागपूरच्या महाकाळकर सभागृहात आयोजित करण्यात आली होती. मात्र, या बैठकीत तुफान वाद उफाळून आला आहे. नरेंद्र जिचकार आणि विकास ठाकरे यांच्यात जोरदार वादावादी आणि राडा झाला. या बैठकीतच माझा घातपात करण्याचा डाव होता, असा धक्कादायक आरोप जिचकार यांनी केला. तर, विकास ठाकरे यांनी जिचकार हे मानसिक रुग्ण असून कुटुंबाने किंवा पक्षाने वैदकिय चाचणी करावी थेट उत्तर दिले आहे. त्यामुळे पक्षांतर्गत वाद पुन्हा एकदा चव्हाट्यावर आला आहे.
मारहाण झाल्याचा आरोप करणाऱ्या नरेंद्र जिचकार यांनी आमदार आणि शहराध्यक्ष विकास ठाकरेवर गंभीर आरोप करत विकास ठाकरे यांनी आधीच पक्षाच्या बैठकीत गुंड बोलावले होते. त्यांच्याकडे हत्यार होते आणि आजच्याच बैठकीत माझा घात करण्याचा कट होता असा आरोप केला आहे. विकास ठाकरे गेले दहा वर्ष नागपूर शहर अध्यक्ष असून केंद्रीय पक्षश्रेष्ठींनी एका पदावर एकच व्यक्तीने राहावे असे निर्देश दिल्यानंतर ही पद सोडत नाही. प्रदेशाध्यक्ष आणि इतर वरिष्ठ नेतेही त्यांच्या जागी दुसऱ्याची नेमणूक करत नाही. आजच्या बैठकीत काँग्रेसच्या उदयपूर अधिवेशनाच्या ठरावानुसार हाच मुद्दा मांडण्याचा प्रयत्न केला असता विकास ठाकरे यांनी माझा घातपात करण्यासाठी आधीच आणलेले गुंड मला मारायला पुढे आल्याचे जिचकार यांनी म्हंटले आहे. आता पक्षश्रेष्ठींनी विकास ठाकरे विरोधात कारवाई करावी अशी मागणी ही नरेंद्र जिचकार यांनी केली आहे.
तर, नरेंद्र जिचकार मानसिक रुग्ण आहे. त्यांच्या कुटुंबीयांनी किंवा पक्षाच्या नेत्यांनी त्यांची वैद्यकीय चाचणी करावी असे मत आजच्या गोंधळानंतर नागपूर शहर काँग्रेस अध्यक्ष विकास ठाकरे यांनी व्यक्त केले आहे. पक्षाचे बैठकीत कोणतेही गुंड नव्हते. तर ते सगळे काँग्रेसचे कार्यकर्ते होते. नरेंद्र जिचकार नेहमीच पक्षाच्या बैठकांमध्ये गोंधळ घालतात. त्यामुळे कार्यकर्त्यांचा रोष उफाळून आला. पक्षश्रेष्ठींनी नरेंद्र जिचकार यांच्या विरोधात अनुशासनात्मक कारवाई करावी अशी मागणी विकास ठाकरे यांनी केली आहे.
नागपूरमधील या बैठकीला काँग्रेस प्रदेशाध्यक्ष नाना पटोले, विरोधी पक्ष नेते विजय वडेट्टीवार, नितीन राऊत, सुनील केदार, माजी खासदार विलास मुत्तेमवार, इतर स्थानिक नेते, आमदार आणि पदाधिकारी उपस्थित होते. त्यांच्या समोर हा राडा झाला. आढावा बैठकीला सुरुवात नागपूर शहर काँग्रेसच्या आढावा बैठकीपासून झाली. बैठकीची सुरवात नाना पाटोले यांच्या संबोधनाने झाली. बैठकीचा उद्देश आणि पुढील निवडणुकींच्या दृष्टीने तयारीवर नाना पटोले यांनी भूमिका स्पष्ट केली. त्यानंतर शहर अध्यक्ष विकास ठाकरे यांनी शहर कार्यकारिणीची माहिती दिली, त्यानंतर त्यांनी राबवलेल्या उपक्रमाचा आढावा दिला. काँग्रेस प्रदेशाध्यक्ष नाना पाटोले यांनी सूचना करत आपले मत मांडले.
मंडल कमिटी, बुथ प्रमुख (BLO) ग्राम समित्या, ब्लॉक कार्यकारिणी जिल्ह्यातील संघटनात्मक माहिती आगामी लोकसभा, विधानसभा सार्वत्रिक निवडणूक 2024 च्या अनुषंगाने मतदार यादी पुनरिक्षण कार्यक्रम बाबत कसे काम करायचे याची माहिती दिली. त्याशिवाय, तळागाळाच्या कार्यकर्त्यांपर्यंत, लोकापर्यंत पोहण्याचे आवाहनही त्यांनी केले.