मुंबई : युकेमध्ये दरवर्षी वर्ल्ड बेस्ट स्कूल अवॉर्डचे आयोजन करण्यात येते. समाजाच्या प्रगतीमध्ये शाळांचे योगदान आणि जगभरातील शाळांना एक मोठे व्यासपीठ मिळण्यासाठी या स्पर्धेचे आयोजन केले जाते. यात जगातील सर्वोकृष्ट शाळांची निवड करण्यात येते. दिल्ली, गुजरात आणि महाराष्ट्रातल्या ५ भारतीय शाळांना जगातल्या सर्वात मोठ्या शाळा पुरस्कारांसाठी निवडण्यात आल्या. यावर्षी जगातील सर्वश्रेष्ठ शाळांच्या यादीत वेगवेगळ्या कॅटेगरीतून १० शाळा निवडण्यात आल्या आहेत.
पुरस्काराचं बक्षिस अडीच लाख यूएस डॉलर्स
सर्वात अभिमानाची बाब म्हणजे तीन शाळा महाराष्ट्रातील असून भारतातील एकूण ५ शाळा वर्ल्ड बेस्ट स्कूलच्या टॉप १० मध्ये आल्या आहेत. या शाळा वेगवेगळ्या विभागांसाठी शॉर्टलिस्ट झाल्या आहेत. या पुरस्काराचं बक्षिस अडीच लाख यूएस डॉलर्स आहे. बक्षिसाची रक्कम पाच जणांमध्ये समान वाटून दिली जाणार आहे. म्हणजेच प्रत्येक शाळेला ५०,००० डॉलर मिळणार आहेत.
भारतातील या पाच शाळांनी जिंकले पुरस्कार
भारतातील शाळांमध्ये मुंबईतील ओबेरॉय इंटरनॅशन स्कूल आहे. दुसरी शाळा ही गुजरातच्या अहमदाबादची रिव्हरसाईड स्कूल आहे. हे एक इंटरनॅशनल स्कूल आहे. महाराष्ट्रातून आणखी दोन शाळा आहेत. यापैकी एक शाळा ही अहमदनगर जिल्ह्यातील आहे. स्नेहालय इंग्लिश मीडियम स्कूल हे एचआयव्ही, एड्सग्रस्त आणि सेक्स वर्करांच्या कुटुंबातील मुलांना शिकवते. चौथी शाळा ही मुंबईतील आकांक्षा फाउंडेशनची शिंदेवाडी मुंबई पब्लिक स्कूल आहे. पाचवी शाळा दिल्लीची सरकारी शाळा नगर निगम प्रतिभा बालिका विद्यालय एफ-ब्लॉक, दिलशाद कॉलोनी आहे.
