नवी दिल्ली : केंद्रीय माध्यमिक शिक्षण मंडळाने (सीबीएसई) दहावी आणि बारावीच्या विद्यार्थ्यांसाठी एक महत्त्वाची अधिसूचना जारी केली आहे. सॅम्पल पेपरच्या नावाखाली विद्यार्थी आणि पालकांनी अफवांना बळी पडू नये, असे सांगण्यात आले आहे. या पेपर्ससाठी बोर्डाने कोणत्याही खासगी प्रकाशकाशी भागीदारी केलेली नाही. त्यामुळे विद्यार्थी आणि त्यांच्या पालकांनी अशा फसवणुकीपासून सावध राहण्याचा सल्ला देण्यात आला आहे.
सीबीएसईचे सराव पेपर घेण्यासाठी शाळा आणि विद्यार्थ्यांना काही खासगी प्रकाशकांच्या साइटवर जाण्यास सांगितले जात असल्याचे बोर्डाच्या निदर्शनास आले आहे. विद्यार्थी आणि त्यांच्या पालकांना तसे न करण्याचा सल्ला देण्यात आला आहे. दहावी, बारावीबोर्डाच्या परीक्षांची तयारी करण्यासाठी आणि पेपर पॅटर्न समजून घेण्यासाठी सीबीएसई दरवर्षी सॅम्पल पेपर जारी करते, जेणेकरून विद्यार्थ्यांना परीक्षेची संपूर्ण कल्पना येऊ शकेल. पण यावेळी अशी बातमी समोर येताच बोर्डाने अधिकृत नोटीस बजावली आहे. यासंदर्भात बोर्डाने अधिकृत वेबसाईट https://www.cbse.gov.in/ वर अधिसूचनाही अपलोड केली आहे, जी तपासता येईल.
सीबीएसई दहावी, बारावीच्या विद्यार्थ्यांनी cbseacademic.nic.in सीबीएसई शैक्षणिक संकेतस्थळावर जाऊनच नमुना पेपर डाऊनलोड करावा, असा सल्ला देण्यात आला आहे. सीबीएसई बोर्ड सध्या खासगी विद्यार्थ्यांचे परीक्षा अर्ज भरत आहे. त्याअंतर्गत विद्यार्थ्यांना ११ ऑक्टोबर २०२३ पर्यंतची मुदत देण्यात आली आहे.
