सोलापूर : सोलापुरात भावकीच्या वादातून भयानक हत्याकांड MURDER CASE उघडकीस आले आहे. जमिनीच्या किरकोळ तुकड्यासाठी पुतण्याने काकांचे शीर धडा वेगळे केले आणि दुचाकीवरून गावात ते शिर घेऊन फिरत होता. यावेळी पोलिसांनी या निर्दयी पुतण्याला ताब्यात घेतले आहे.
मिळालेल्या सविस्तर माहितीनुसार, सोलापूर जिल्ह्यातील माढा तालुक्यातील शेवरे या गावांमध्ये शंकर जाधव हे राहत होते. शंकर जाधव यांचे पुतण्या शिवाजी जाधव यांच्याशी जमिनीच्या तुकड्यावरून वाद सुरू होते. हा वाद न्यायालयात देखील सुरू होता. दरम्यान सोमवारी सकाळी अकरा वाजण्याच्या सुमारास शंकर जाधव हे डोळ्याचे ऑपरेशन झालं असल्याकारणाने घरात झोपले होते. तर इतर घरातील लोक हे शेतात कामासाठी गेले असताना शिवाजी जाधव, आकाश जाधव आणि आणखी दोघे भाऊ शंकर जाधव यांच्या घरात घुसले.
Related posts
यावेळी शंकर जाधव झोपलेले असताना त्यांच्यावर या चौघा जणांनी हल्ला केला आणि कुऱ्हाडीने घाव घालून त्यांचे शीर धडा वेगळे केले. त्यानंतर तिघे भाऊ पसार झाले आणि मुख्य आरोपी शिवाजी जाधव हा आपल्या काकांचे शीर घेऊन दुचाकीवरून निघाला. यावेळी धक्कादायक पद्धतीने शिवाजी जाधव हा आपल्या काकांच शिर घेऊन गावात फिरत होता.
पोलिसांना या घटनेची माहिती मिळाल्यानंतर पोलिसांनी घटनास्थळी धाव घेतली. ही गोष्ट शिवाजी जाधव याला लक्षात येताच त्याने अकलूजच्या दिशेने पळ काढला. पोलीस शिवाजी जाधव याचा पाठलाग करत होते. अकलूजमध्ये शिवाजी जाधव याने थेट पोलीस स्टेशनला जाऊन स्वतःला पोलिसांच्या ताब्यात दिले. त्यानंतर पोलिसांनी गावाच्या जवळपासच दुसरा भाऊ आकाश जाधव याला देखील अटक केली आहे.
दरम्यान या प्रकरणातील इतर दोन आरोपींचा पोलीस शोध घेत असून शिवाजी जाधव आणि आकाश जाधव या दोन आरोपींना माढा न्यायालयाने 18 डिसेंबर पर्यंत पोलीस कोठडी सुनावली आहे.
