नवी दिल्ली : देशभरातील पेट्रोल आणि डिझेलच्या किंमती गेल्या काही दिवसांत फार बदललेल्या नाहीत परंतु त्या सातत्याने उच्च पातळीवर राहिल्या आहेत. मात्र येत्या काळात या किंमती कमी होण्याचे संकेत पेट्रोलियम मंत्री हरदीप सिंग पुरी यांनी दिले आहेत. (Petrol diesel price latest news) त्यामुळे लवकरच सर्वसामान्यांना पेट्रोल-डिझेल किंमतीच्या बाबतीत दिलासा मिळेल, अशी शक्यता वर्तवली जात आहे.
आंतरराष्ट्रीय बाजारात तेलाच्या किंमती स्थिर राहिल्यास आणि तेल कंपन्यांची पुढील तिमाहीतील कामगिरी चांगली राहिल्यास इंधनाचे भाव कमी करण्याबाबत विचार केला जाईल, असे संकेत पुरी यांनी दिले आहेत.
पेट्रोल आणि डिझेलचे दर हा मुद्दा सर्वसामान्यांच्या जीवनावर परिणाम करणारा आहे. भारतीय तेल कंपन्यांनी बऱ्याच काळापासून किमतीत बदल केला नसला तरी मुंबई सारख्या शहरात आज पेट्रोल १०६.३१ रुपये व डिझेल ९४.२७ प्रति लिटर इतक्या दराने विकले जात आहे. इंधनाचे दर वाढल्याने अनेक जिवनावश्यक गोष्टींचे दर देखील वाढले आहे. मात्र आता येत्या काळात इंधनाचे दर कमी झाल्यास सर्वसामान्यांना मोठा दिलासा मिळेल.
देशातील २०२४ च्या सार्वत्रिक निवडणुकीपूर्वी हरदीप सिंग पुरी यांच्या या विधानाला राजकीय महत्त्व आहे. महागाई, पेट्रोल-डिझेलचे दर आदींबाबत प्रमुख विरोधी पक्ष काँग्रेसने मोदी सरकारवर सातत्याने हल्लाबोल केला आहे. अशा स्थितीत पुरी यांच्या या विधानाकडे पेट्रोल आणि डिझेलचे दर कमी होण्याचे संकेत मानले जात आहेत.
“आता काही निश्चित सांगू शकत नाही” !
पेट्रोलियम मंत्री हरदीप सिंग पुरी यांनी पेट्रोल आणि डिझेलच्या दरात कपात करण्याबाबत कोणतीही घोषणा करू शकत नसल्याचे स्पष्ट केले. पुढे काय होते आणि काय करता येईल हे पाहावे लागेल, असं ते म्हणाले.
हरदीप सिंग पुरी पुढे बोलताना म्हणाले की, पेट्रोल आणि डिझेलच्या किंमती बाजारावर अवलंबून असतात, परंतु मोदी सरकारने एप्रिल २०२२ पासून त्यांच्या किंमती वाढू दिलेल्या नाहीत. सर्वसामान्यांना कोणत्याही समस्येला सामोरे जावे लागू नये यासाठी सरकारचा प्रयत्न आहे. यापूर्वी देखील हरदीप सिंग पुरी यांनी इंधन विक्री करणाऱ्या कंपन्यांना दर कमी करण्याचे आवाहन केले होते.
