पुणे : पुणे शहर पुन्हा एकदा भयानक घटनेने हादरले आहे. काही दिवसांपूर्वी अशाच एका हल्ल्यांमध्ये एका तरुणीने आपले प्राण गमावले होते. आणि ती घटना देखील अशीच भरपेठेत घडली होती. आज पुन्हा एकदा शुक्रवार पेठेत अशीच एक घटना होता होता राहिली आहे.
नेमकं काय घडलं
मिळालेल्या माहितीनुसार, पुण्याच्या शुक्रवार पेठमध्ये एक तरुण त्याच्या एकतर्फी प्रेमातून अकरावीत शिकणाऱ्या एका अल्पवयीन मुलीवर कोयत्याने वार करण्यासाठी आला होता. यावेळी बाईकवरून दोघेजण आले. या मुलानं मुलीला कोयता फेकून मारण्याचा सुरुवातीला प्रयत्न केला. पण तो कोयता खाली पडला. त्यानंतर तो उचलण्यासाठी बाईक वरून तो उतरला आणि त्या युवतीच्या दिशेने जाणार त्या आधीच हा सर्व प्रकार पाहणाऱ्या एका महिलेने आरडाओरडा केला. या महिलेच्या आरडाओरड्याने आजूबाजूचे लोक आपल्याला मारतील आणि आपण पकडले जाऊ या भीतीने या तरुणांना तिथून पळ काढला. त्यामुळे या अल्पवयीन मुलीचे प्राण वाचले आहेत.
Mumbai Breaking : नवी मुंबईतील पावणे एमआयडीसीतील केमिकल कंपनीला भीषण आग; Video Viral
या महिलेच्या सदसदविवेकी बुद्धीमुळेच या तरुणीचे प्राण वाचले आहेत असं म्हणावं लागेल. याप्रकरणी पोलिसांनी आरोपी महेश भंडारी या व्यक्ती विरोधात गुन्हा दाखल केलाय. एकतर्फी प्रेमातून नकार मिळाल्यामुळेच आणि ही मुलगी आरोपीशी बोलत नसल्याच्या रागातूनच त्याने हा प्रकार केला असल्याच समजत आहे. या घटनेने पुण्यात एकच खळबळ उडाली आहे.
विशेष म्हणजे या संपूर्ण प्रकारातून पोलिसांनीच या आरोपीच्या विरोधात गुन्हा दाखल केला आहे. या तरुणीने अद्याप देखील स्वतःहून पोलिसांकडे तक्रार दाखल केलेली नाही.
