मुंबई : लोकसभा निवडणुका आता तोंडावर आल्या आहेत. अशातच राजकीय खलबतींना देखील वेग आला आहे. एकनाथ शिंदे यांनी उद्धव ठाकरे यांच्यासोबत बंड केलं. शिवसेना विभागली गेली. एकनाथ शिंदेंबरोबर अनेक आमदार आणि खासदार देखील गेले. ठाकरे गटाला लागलेली गळती थांबायचं नाव घेत नसताना आता एक मोठी बातमी समोर येते.
नाशिकचे ठाकरे गटाचे नेते सुधाकर बडगुजर यांनी एक मोठा दावा केला आहे. कार्यकर्त्यांशी बोलत असताना ते म्हणाले की, ” गेल्या अनेक दिवसांपासून नाशिकचे खासदार हेमंत गोडसे हे मिलिंद नार्वेकरांच्या संपर्कात आहेत. हेमंत गोडसे हे पुन्हा एकदा ठाकरे गटात येण्यासाठी प्रयत्न करत आहेत. असा दावा बडगुजर यांनी केला आणि एकच खळबळ उडाली.
हेमंत गोडसे हे खरंच एकनाथ शिंदे यांची साथ सोडून पुन्हा घर वापसी करणार का ? यावर खरंतर कोणीही शिक्कामोर्तब केलेलं नाही. सूत्रांनी दिलेल्या माहितीनुसार खासदार हेमंत गोडसे हे ठाकरे गटात प्रवेश करण्यासाठी मिलिंद नार्वेकरांच्या संपर्कात असल्याचं समजत आहे. त्यामुळे लोकसभा निवडणुकीच्या पार्श्वभूमीवर राजकीय वर्तुळात आणखी किती हालचाली होणार आहेत हे येणारा काळ स्पष्ट करत राहील.
